पाचुंदकर विरुद्ध पाचुंदकर राजकीय संघर्ष कायम ?

भाजप प्रवेशाने नाराजीचा सूर, ज्योती पाचुंदकर नवा चेहरा.

शिरुर | “आमचा सुसंस्कृत तालुका, परंतु गेल्या काही वर्षांपासून वेगवेगळ्या गुंडगिरी, दडपशाहीचा वापर वाढू लागल्याने वंचित घटकांचा आवाज म्हणून आम्ही भाजपमध्ये प्रवेश करतोय” या एका वाक्याचा आधार घेत माजी जिल्हा परिषद सदस्य शेखर पाचुंदकर यांनी भाऊ उद्योजक दत्तात्रय पाचुंदकर आणि माजी जिल्हा परिषद सदस्या स्वाती पाचुंदकर यांनी प्रदेशाध्यक्ष रविंद्र चव्हाण यांच्या उपस्थितीत मुंबईमध्ये भाजप प्रवेश केला. दरम्यान भाजपमध्ये प्रवेश होताच स्वाती पाचुंदकर यांच्यावर आरोप असलेल्या जमीन घोटाळ्याची चर्चा अधिक वाढली. त्यांचे पती दत्तात्रय पाचुंदकर हे रांजणगाव गणपती अर्थात रांजणगाव औद्योगिक क्षेत्रातील मोठे उद्योगपती आहेत. तर स्वाती पाचुंदकर यापूर्वी रांजणगाव गणपतीच्या सरपंच आणि रांजणगाव- कारेगाव जिल्हा परिषद गटाच्या सदस्या राहिल्या आहेत. त्याचबरोबर त्या रांजणगाव गणपती देवस्थान ट्रस्टच्या विद्यमान अध्यक्षा देखील आहेत. अर्थात सत्तेच्या पदांवर नेहमीच त्यांचा वावर राहिला आहे.

रांजणगावची सरकारी ७२ गुंठे जमीन पाचुंदकर यांनी लाटल्याचा आरोप त्यांच्यावर झाला आहे, त्याचबरोबर या प्रकरणी ग्रामपंचायत कर्मचारी, तत्कालीन ग्रामसेवक आणि स्वाती पाचुंदकर यांच्यावर सदर प्रकरणाचा गुन्हा दाखल आहे. कर्मचारी आणि ग्रामसेवक यांना अटक देखील झाली होती, स्वाती पाचुंदकर यांना मात्र कोर्टाकडून जामीन मिळवण्यात यश आले होते. हे प्रकरण आता न्यायालयात प्रलंबित आहे.

पाचुंदकर कुटुंब शिरुर तालुक्याच्या सक्रिय राजकारणात अग्रभागी आहे. शेखर पाचुंदकर, स्वाती पाचुंदकर, मानसिंग पाचुंदकर ही तीनही नावं तालुक्याच्या राजकारणात प्रभावी आहेत. रांजणगाव – कारेगाव जिल्हा परिषद गटात पाचुंदकर कुटुंबीयांचा मोठा प्रभाव पहायला मिळतो. पाचुंदकर कुटुंब यापूर्वी सर्वाधिक चर्चेला आले ते दोन भावांच्या राजकीय संघर्षामुळे रांजणगाव – कारेगाव जिल्हा परिषद गटात निवडणूक लढविण्यासाठी गेल्या ५ वर्षांपासून मानसिंग पाचुंदकर आणि शेखर पाचुंदकर यांच्यात राजकीय संघर्ष सुरू होता. मानसिंग पाचुंदकर एक मोठे उद्योगपती म्हणून ओळखले जातात, त्याचबरोबर माजी मंत्री दिलीप वळसे पाटील यांचे विश्वासू सहकारी म्हणून देखील त्यांची ओळख आहे. पाचुंदकर कुटुंबाकडे असलेली आर्थिक ताकद आणि त्या जोरावर सुरू असलेले राजकारण हा देखील विषय सातत्याने चर्चिला जातो.

दोन भावांच्या राजकीय संघर्षात रांजणगाव – कारेगाव जिल्हा परिषद गटातील सर्वसामान्य मतदार नेमका कोणाला कौल देणार हे आगामी निवडणूकच ठरवेल. मानसिंग पाचुंदकर यांनी गटातील प्रत्येक कार्यकर्त्यांशी आपला संपर्क मजबूत केला आहे, तर राष्ट्रवादी काँग्रेस पक्षाचे ते अनेकवर्षे तालुकाध्यक्ष असल्याने पक्षातील कार्यकर्त्यांवर त्यांचा प्रभाव आहे. आमदार दिलीप वळसे पाटील यांच्या विधानसभा निवडणुकीत त्यांचा नेहमीच सिंहाचा वाटा राहिला आहे. यामुळे संपूर्ण तालुक्यातील कार्यकर्त्यांशी त्यांचा सातत्याने संपर्क आला आहे. शिरूर कृषी उत्पन्न बाजार समितीचे ते उपसभापती राहिले आहेत. तर शेखर पाचुंदकर हे एकदा जिल्हा परिषद सदस्य राहिले आहेत. त्यानंतर जिल्हा परिषद निवडणुकीत त्यांचा एकदा पराभव झाला आहे. दरम्यान ते ‘सहानुभूतीचे राजकारण’ यावर भर देत जिल्हा परिषद गटात नेहमीच संपर्क ठेऊन आहेत. राष्ट्रवादी काँग्रेस शरद पवार पक्षाच्या तालुका अध्यक्ष पदावर देखील त्यांनी काम केले आहे. दरम्यान राष्ट्रवादी काँग्रेस पक्षाचे दोन गट झाल्यानंतरही शेखर पाचुंदकर आणि दत्तात्रय पाचुंदकर यांनी दिलीप वळसे पाटील यांच्या व्यासपीठावर जाहीर हजेरी लावली होती. त्याचबरोबर विधानसभा निवडणुकीत ज्या प्रकारे शेखर पाचुंदकर राष्ट्रवादी काँग्रेस शरद पवार पक्षाचे उमेदवार देवदत्त निकम यांच्या प्रचारात सहभागी होते त्या तुलनेत स्वाती व दत्तात्रय पाचुंदकर यांचा सहभाग कमी असल्याच्या अनेकदा चर्चा झाल्या होत्या.

दरम्यान रांजणगाव – कारेगाव जिल्हा परिषद गटासाठी आरक्षण सोडतीत महिला आरक्षण आल्यानंतर तात्काळ दुसऱ्याच दिवशी शेखर पाचुंदकर आणि स्वाती पाचुंदकर यांनी भाजपमध्ये प्रवेश केला. त्यामुळे आगामी काळात भाजपकडून स्वाती पाचुंदकर याच उमेदवार असतील तर त्यांच्या समोर यापूर्वी कोणतेही राजकीय पद नसलेल्या मानसिंग पाचुंदकर यांच्या पत्नी ज्योती पाचुंदकर यांची राष्ट्रवादी काँग्रेस पक्षाकडून उमेदवारी असेल अशा चर्चांना उधाण आले आहे. त्या अनुषंगाने दोन्ही बाजूंनी समाज माध्यमांवर पोस्टर देखील व्हायरल झालेले पाहायला मिळाले आहेत.

स्वाती पाचुंदकर यांनी ग्रामपंचायत सदस्या, सरपंच, जिल्हा परिषद सदस्या अशा विविध पदांवर काम केले तर त्या सध्या रांजणगाव गणपती देवस्थान ट्रस्टच्या अध्यक्षा देखील आहेत. यापूर्वी जिल्हा परिषद सदस्या असताना त्यांनी गटात माजी मंत्री दिलीप वळसे पाटील यांच्या माध्यमातून अनेक विकासकामे केली आहेत. तर जिल्हा परिषद सदस्या पदाचा कार्यकाळ संपल्यानंतर देवस्थान ट्रस्टच्या अध्यक्षा पदाची जबाबदारी मिळाल्यावर गटातील संपर्क कमी झाला आहे. त्याचबरोबर नुकताच भाजपमध्ये प्रवेश केल्यानंतर गटात नाराजीचा सूर पाहायला मिळतो. तर दुसरीकडे मानसिंग पाचुंदकर यांच्या पत्नी ज्योती पाचुंदकर या नव्याने पतीच्या जनसंपर्काचा आधार घेत जिल्हा परिषद गटात सक्रिय होऊ पहात आहेत.

आगामी निवडणुकीत स्वाती पाचुंदकर विरुद्ध ज्योती पाचुंदकर अशी लढत झाल्यास एका बाजूला अनुभवी आणि तर दुसऱ्या कोरी पाटी असा प्रचार पाहायला मिळेल. त्याचबरोबर स्वाती पाचुंदकर या जमीन घोटाळ्यातील आरोपी, कार्यकाळ संपताच गटातील कमी झालेला संपर्क, ऐन निवडणुकीच्या तोंडावर केलेला भाजप प्रवेश या नकारात्मक बाबींना देखील त्यांना सामोरे जायला लागू शकते. तर इकडे मानसिंग पाचुंदकर चर्चेत न येता पक्ष पातळीवर आपला संपर्क ठेऊन कायम आहे. त्याचबरोबर अनेक ग्रामपंचायतींवर त्यांचे वर्चस्व कायम आहे.

रांजणगाव – कारेगाव गटात आगामी काळात पाचुंदकर विरुद्ध पाचुंदकर असा राजकीय संघर्ष आणखी गडद होण्याची शक्यता नाकारता येत नाही.