निवडणुकीचा नवा फंडा, देवदर्शन यात्रा…!

विकास, पक्षनिष्ठा अडगळीत ; वाया अक्कलकोट, उज्जैन.

शिरुर | पुणे जिल्ह्यातील राजकारणात निवडणूक जिंकण्यासाठी नवा पॅटर्न उदयास येऊ लागला आहे. खिसा गरम असेल तर मतदारांना आपल्या बाजूने वळवण्याचा नवा फंडा स्थानिक स्वराज्य संस्थांच्या निवडणुकीच्या पार्श्वभूमीवर समोर आला आहे. निवडणूक डोळ्यासमोर ठेवून जेष्ठांना, महिलांना किंवा सरसकट मतदारांना देवदर्शन घडविण्यासाठी अनेक पुढाऱ्यांनी विशेष बस, रेल्वे, विमानाचा वापर केला आहे. देवाच्या दर्शनाला घेऊन जायचं आणि भावनिक साद घालून मतदारांना आपलंसं करायचं हा नवीन पॅटर्न इच्छुक उमेदवारांनी राबवायला सुरुवात केली आहे. इतर वेळी मतदारांच्या संपर्कात न येता केवळ पैशांच्या जोरावर निवडणूक जिंकायचा पॅटर्न शिरुर तालुक्याने अनेकदा धुडकावून लावला आहे.

सतत मतदारांच्या दहा, वीस, तीस वर्षे संपर्कात किंवा सुख – दुःखात सहभागी असलेल्या कार्यकर्त्यांनी त्याचबरोबर लाईट, पाणी, रस्ते, सरकारी कार्यालयातील कामे, शिक्षण, आरोग्य विषयी नागरिकांचे सोडवलेले प्रश्न याचा विचार न होता केवळ देवदर्शन यात्रा किंवा मतदारांना पैसे देऊन मत विकत घेण्याची चढाओढ लागली तर सामान्य कार्यकर्त्यांनी केवळ नेत्यांच्या सतरंज्या उचलायचा का ? असा सवाल यानिमित्ताने उपस्थित होतो. शिरुर – हवेलीचे आमदार माऊली कटके यांनी देखील अशा देवदर्शन यात्रा करून मतदारांना आपलंसं केलं त्याचबरोबर विरोधी उमेदवारांवर मतदारसंघात असलेली नाराजी आणि सगळ्यात महत्वाचे म्हणजे सरकारने विधानसभा निवडणुकीपूर्वी सुरू केलेली ‘लाडकी बहीण’ योजना आमदार कटकेंच्या निवडणुकीत प्रभाव टाकून गेली.

तर दुसरीकडे याच शिरुर तालुक्याने वर्गणी गोळा करून एका शिक्षकाला अर्थात सूर्यकांत काका पलांडे यांना आमदार केलं, तर ख्यातनाम उद्योगपतीचा म्हणजेच रसिकलाल धारिवाल यांचा मोठ्या फरकाने पराभव केला आहे. तर जिल्हा परिषदेच्या निवडणुकीत देखील सामान्य कार्यकर्ते स्व. बाळासाहेब खैरे यांना वर्गणी देऊन निवडून देखील आणलं आणि राज्याच्या माजी गृहराज्यमंत्र्यांच्या, माजी खासदारांच्या मुलाचा म्हणजे राजेंद्र थिटे यांचा पराभव केला आहे. त्यामुळे पैशांच्या जोरावर निवडणुका होऊ न देण्याची शिस्त शिरुर तालुक्याने अनेकदा अनुभवली आहे. मात्र दरम्यानच्या काळात शिरुर तालुक्यात उभी राहिलेली औद्योगिक वसाहत, जमिनींना आलेले सोन्याचे भाव, वाढते नागरीकरण अशा वेगवेगळ्या माध्यमातून अचानक आलेली संपत्ती अनेकांना राजकारणात प्रवेश करायला भाग पाडते. परंतु सर्वसामान्य जनता या निवडणुकीत नक्की कोणाला कौल देणार हे आगामी काळच ठरवेल.

जिल्हा परिषद सदस्य होण्याचा मार्ग जर उज्जैन, अक्कलकोट मार्गे जात असेल तर एकाच जिल्हा परिषद गटातील परस्पर विरोधी दोन्ही उमेदवारांनी या देवदर्शन यात्रा केल्या तर देव नेमकं कोणाला पावणार ? हा देखील सवाल आहेच. मतदारांना आमिष देऊन निवडणूक लढविण्यापेक्षा आजपर्यंत सुख – दुःखात नक्की यापैकी कोण सहभागी होता आणि वीज, रस्ते, पाणी, शिक्षण, आरोग्य क्षेत्रात नक्की कोणाची नागरिकांना मदत झाली हे पाहूनच मतदार निर्णय घेतील एवढं मात्र नक्की….

(क्रमशः)