मा. आमदार काकासाहेब पलांडे कडाडले.
पाबळ | स्थानिक स्वराज्य संस्थांच्या निवडणुकीचे पडघम वाजू लागले आहेत. संपूर्ण राज्यभर निवडणुकीचे वातावरण आहे. निवडणूक जिंकण्यासाठी मतदारांना प्रलोभने दाखवली जात आहेत. देवदर्शन यात्रा, क्रिकेटचे सामने, एवढंच काय तर चार- चार महिने अगोदर महापुरुषांच्या जयंतीचे कारण पुढे करून बैलगाडा शर्यती भरवल्या जाऊ लागल्या आहेत. मतदारांना प्रलोभन देऊन आपलसं करण्याचा एककलमी कार्यक्रम सुरू आहे. यावर शिरुर तालुक्याचे माजी आमदार सूर्यकांत उर्फ काकासाहेब पलांडे यांनी जातेगाव बुद्रुक (ता. शिरुर) येथील एका दशक्रिया विधीमध्ये परखड मत व्यक्त करत पैशांची उधळपट्टी करणाऱ्या इच्छुक उमेदवारांना फैलावर घेतले.
पूर्वीच्या निवडणुकीत पैशांचा वापर होत नव्हता कितीही पैशावाला उमेदवार असला तरी योग्य उमेदवाराला मत मिळायची. कोट्याधीश असलेले माझे मित्र रसिकभाऊ धारिवाल यांना सामान्य मतदारांनी नाकारलं आणि माझ्यासारख्या सामान्य शेतकरी कुटुंबातील युवकाला संधी दिली माझ्याकडे निवडणुकीत खर्च करण्यासाठी पैसे नव्हते परंतु वर्गणी करून घरच्या भाकरी बांधून माझ्या सहकाऱ्यांनी निवडणुकीचा प्रचार केला.
दुष्काळ होता, घरातील टोपल्यात भाकर नव्हती परंतु सामान्य माणसांनी कधीही आपलं मत विकले नाही कोणाच्या एकाही रुपयाला हात लावला नाही, कोणत्याही प्रलोभनाला बळी पडले नाही. आणि आज नेमकं तुम्हाला झालंय काय ? असा सवाल मा. आमदार काकासाहेब पलांडे यांनी उपस्थित मतदारांना केला. शिरुर तालुक्याची ख्याती संपूर्ण राज्यात आहे. निवडणुकीत पैशाचा वापर करणाऱ्या उमेदवाराला सामान्य जनता नाकारते हा शिरुर तालुक्याचा इतिहास आहे हे विसरून आपल्याला चालणार नाही.
पुढे ते म्हणाले की, जेव्हा मी निवडून आलो तेव्हा आपल्या तालुक्यातील मतदारांचे कौतुक खुद्द यशवंतराव चव्हाण यांनी केले होते. शिरुर तालुका हा नैतिकता जपणारा तालुका म्हणून त्यांनी आपल्या तालुक्याबद्दल गौरवोद्गार काढले होते. आणि आज तालुक्यात भयानक परिस्थिती निर्माण झाली आहे. पैसे दिल्या शिवाय पर्याय नाही असं लोकं म्हणतात. पैशाशिवाय मत मिळणार नसेल तर सामान्य कार्यकर्त्यांनी हे सुख- दुःखाचे कार्यक्रम आणि लोकांच्या अडचणीत उभं राहायचं कशासाठी ? सामान्य कार्यकर्त्यांनी आज धाक घेतलाय पैशांची उधळपट्टी करणाऱ्या इच्छुक उमेदवारासमोर आपला निभाव कसा लागायचा हा प्रश्न गोरगरीब कार्यकर्त्यांच्या समोर उभा राहिला आहे.
दुष्काळी परिस्थिती असताना टोपल्यात भाकरी नसताना कोणाच्याही रुपयाला हात न लावता आपल्या पूर्वजांनी मतदान केलं आणि आज तुम्हाला नेमकं झालंय काय ? तुमचं सगळं चांगलं असताना पैशेवाल्याच्या मागे पळता? काय प्रकार आहे हा ? याला वेळीच आवर घाला अन्यथा तुमच्या कुटुंबातील भविष्यात इच्छुक होणाऱ्या सामान्य कार्यकर्त्यांचे अर्थात गरिबांचे राजकारण संपून जाईल. असे परखड भाष्य यानिमित्ताने पलांडे यांनी केले.
आणखी बोलताना ते म्हणाले की, तुम्ही सगळ्यांनी ठरवलं तर कोणी किती पैशावाला उभा राहुद्या त्याला मत न देता सामान्य कार्यकर्त्याला, काम करणाऱ्या कार्यकर्त्याला आणि समाजात नेहमी उपलब्ध असलेल्या कार्यकर्त्याला मत द्या. पुन्हा एकदा या तालुक्याची वैचारिक उंची दाखवून द्यायची वेळ आली आहे. मला बोलण्याची जिथे जिथे संधी मिळेल तिथे मी हेच आवाहन करणार आहे. पैशावल्याचा पैसा घ्या आणि सामान्य कार्यकर्त्याला निवडून द्या, लाचार होऊ नका, मिंधे होऊ नका, गरीब माणसाला देखील निवडणूक लढवता आली पाहिजे असं उदाहरण निर्माण करा. तरुणांनी एकत्र या आणि भविष्यात चांगलं राजकारण करण्यासाठी राजकारणातून पैसा बाजूला करा. असे आवाहन करताच उपस्थित नागरिकांनी मा. आमदार पलांडे यांच्या वक्तव्याचे कौतुक करत टाळ्यांचा कडकडाट झाला. दरम्यान पैशाच्या जोरावर राजकारण करू पाहणाऱ्या सर्वच इच्छुक उमेदवारांना यानिमित्ताने माजी आमदार काकासाहेब पलांडे यांनी जबरी चपराक लगावली असल्याची कुजबुज दशक्रियाचा कार्यक्रम संपताच उपस्थितांच्यात सुरू झाली.
Add Comment