टाकळी हाजी | माजी आमदार पोपटराव गावडे यांचा बालेकिल्ला असलेला टाकळी हाजी जिल्हा परिषद गट सर्वसाधारण जागेसाठी आरक्षित असल्याने अनेकांच्या नजरा या गटाकडे वळल्या आहेत. या पूर्वीच्या तीन निवडणुका पाहता तीनही निवडणुकीत माजी आमदार पोपटराव गावडे यांच्या गटाला सातत्याने धक्का बसला आहे. मग ती ग्रामपंचायत निवडणूक असो किंवा विधानसभा, लोकसभा निवडणुक. येऊ घातलेल्या जिल्हा परिषद, पंचायत समितीच्या निवडणुकीत माजी आमदार गावडे यांचे चिरंजीव राजेंद्र गावडे या निवडणुकीच्या रिंगणात उतरणार आहेत परंतु त्याअगोदरच बाहेरच्या नेत्यांनी या गटाकडे आपला मोर्चा वळवला आहे.
दरम्यान विधानसभा निवडणुकीत माजी मंत्री दिलीप वळसे पाटील यांना सर्वाधिक फटका याच जिल्हा परिषद गटात बसला आहे प्रतिस्पर्धी उमेदवार देवदत्त निकम यांना या गटातून सर्वाधिक मताधिक्य मिळाले त्यामुळे देवदत्त निकम यांच्या या जिल्हा परिषद गटाकडून अशा पल्लवित झाल्या असल्याचे बोलले जात आहे. विधानसभा निवडणुकीत मताधिक्य मिळाले आहे तर जिल्हा परिषद निवडणुकीत देखील निकम यांना मताधिक्य मिळेल या आशेवर निकम यांचे समर्थक या टाकळी हाजी गटातून स्वतः देवदत्त निकम हे निवडणूक लढवतील अशी अपेक्षा ठेऊन आहेत. गेल्या काही महिन्यांपासून निकम यांचे दौरे या भागात वाढले आहेत. बिबट्याचा प्रश्न सातत्याने लावून धरत या भागातील मतदारांना आणखी प्रभावित करण्याचा प्रयत्न निकम यांच्याकडून होत आहे.
तर दुसरीकडे मात्र राजेंद्र गावडे यांचे कट्टर प्रतिस्पर्धी मानले जाणारे दामू घोडे यांची उमेदवारी मात्र अद्याप गुलदस्त्यातच असल्याचे बोलले जात आहे. परंतु सर्वसाधारण जागेचे आरक्षण असल्याने कवठे यमाई गावचे माजी सरपंच बाळासाहेब डांगे यांनी देखील शड्डू ठोकला आहे. सातत्याने मोठ्या कुटुंबातील किंवा पैशेवल्यांनीच निवडणूक लढवायच्या का ? असा सवाल करत आगामी जिल्हा परिषद सदस्य पदाची निवडणूक लढविणार असल्याचे संकेत डांगे यांनी दिले आहेत. त्यांच्या जोडीला संविदणे गावचे उपसरपंच भाऊसाहेब लंघे यांनी देखील आपल्या उमेदवारीसाठी आग्रह धरला आहे. डॉ. सुभाष पोकळे, सावित्रा थोरात या दिग्गजांची नावे देखील इच्छुक उमेदवारांच्या यादीत आहेत.
या टाकळी हाजी जिल्हा परिषद गटात आणखी एक नवीन ट्विस्ट पाहायला मिळत आहे. जिल्हा परिषदेचे माजी आरोग्य व बांधकाम सभापती मंगलदास बांदल हे देखील या गटाची चाचपणी करत असल्याच्या चर्चा होत आहेत. देवदत्त निकम यांच्या चर्चा सुरू झाल्यानंतर बांदल यांचे या भागात फ्लेक्स लागलेले पाहायला मिळाले. आगामी निवडणुकीत या गटात नेमका कोणाचा करीष्मा चालणार याकडे सर्वांचे लक्ष लागून आहे. मात्र मंगलदास बांदल यांची या गटात एन्ट्री होताच अनेकांची धांदल उडाली एवढं मात्र नक्की. दरम्यान आगामी काळात देवदत्त निकम विरुद्ध मंगलदास बांदल यांच्यात लढत झाली तर नवल वाटायला नको. तर राजेंद्र गावडे, दामू घोडे, डॉ. सुभाष पोकळे, बाळासाहेब डांगे यांची या निवडणुकीत काय भूमिका असेल याकडे सर्वांचे लक्ष लागून राहील.
Add Comment