पदांची मांदियाळी, देवदर्शनाची आली पाळी…!

शिरूर : राज्यात मिनी विधानसभा निवडणुकीचे बिगुल वाजले आहे. जिल्हा परिषद निवडणूक जाहीर होण्यापूर्वीच उमेदवारांनी प्रचाराची सुरुवात केली आहे. अशातच पुण्यातील अनेक जिल्हा परिषद गटात पाच वर्ष विकासकामे केले असल्याचे भासवून देखील मतदारांना आकर्षित करण्यासाठी देवदर्शन यात्रा सुरू करण्यात आली आहे.

शिरूर तालुक्यातील राजकीय वर्तुळात सध्या सर्वाधिक चर्चा रंगत आहे. एका जिल्हा परिषद गटातील माजी जिल्हा परिषद सदस्या यांना विविध पदांचा व कामकाजाचा अनुभव आहे. संपूर्ण कार्यकाळ परिसरात सक्रिय कामकाज करत असूनही, पुन्हा निवडणुकीसाठी त्यांनी नुकतीच काढलेली देवदर्शन यात्रा नागरिकांमध्ये विविध अर्थाने चर्चिली जात आहे.

पहिल्या जिल्हा परिषद निवडणुकीत त्यांनी राष्ट्रवादी काँग्रेसच्या मजबूत संघटनेसोबत, तसेच प्रमुख नेत्यांच्या नेतृत्वाखाली निवडणूक लढवली होती. त्यावेळी त्या मतदारसंघात राष्ट्रवादीचा प्रभाव मोठा असल्याने, विजयाची समीकरणे तुलनेने सोपे मानले जात होते. त्या काळात पक्षात एकजूट असल्याने त्यांना चांगला राजकीय फायदा मिळाला होता. मात्र पक्षात फूट पडल्याने शरद पवार यांच्याशी एकनिष्ठतेचा नारा देत त्यांनी लोकसभा निवडणुकीत मोठा विजय पाहायला मिळाला होता. मात्र विधानसभा निवडणुकीच्या प्रचारात सक्रिय सहभाग दिसला नाही. तद्नंतर त्यांनी घेतलेला भाजप प्रवेशाचा निर्णय राजकीय प्रवासातील मोठा चर्चेचा मुद्दा ठरला. पण या प्रवेशानंतर जुन्या कार्यकर्त्यांचा पाठिंबा टिकेल का आणि नवीन मतदारांपर्यंत कसे पोहोचता येईल, हा मोठा प्रश्न निर्माण झाला आहे.

याच पार्श्वभूमीवर त्यांनी एकनिष्ठता सोडून इतर पक्षाचा झेंडा हाती घेऊन हिंदू धर्मियांसाठी जिल्हा परिषद गटात देवस्थाने, मंदिरे, धार्मिक ठिकाणांचा आधार घेताना पाहायला मिळत आहे. मतदारांसाठी थेट देवदर्शन यात्रा सुरू केली आहे. ही यात्रा म्हणजे मतदारांशी नव्याने संपर्क जोडण्याचा प्रयत्न की राजकीय संदेश देण्याची रणनीती या बाबतही नागरिकांमध्ये चर्चेला उधाण आले आहे. विविध पदांवर राजकीय व सामाजिक प्रवास करत असताना विकासकामे केलीत का ? की फक्त कामांचा भास करून दिला आणि यामुळे पुन्हा एकदा देवदर्शन यात्रेच्या माध्यमातून जनतेत विश्वास निर्माण करण्याचा प्रयत्न करत आहे अशी चर्चा मतदारांमध्ये होताना पाहायला मिळत आहे.

काही समर्थक याला धार्मिक आशीर्वादाची परंपरा म्हणत आहेत, तर विरोधकांनी याला मतदारांना आकर्षित करण्याची धडपड आहे का काय ? असा सवाल उपस्थित करत आहे. या कारणांमुळे त्यांना पुन्हा जमिनीवर काम करताना अधिक मेहनत घ्यावी लागणार आहे एवढे मात्र नक्की.