जिल्हाध्यक्षांचे दुर्लक्ष, पवारांच्या पक्षाची दुरवस्था.
पाबळ | शिरुर तालुक्याची दोन विधानसभा मतदारसंघात विभागणी झाली खरी, परंतु आंबेगाव विधानसभा मतदारसंघाला जोडलेली ४२ गावं नेहमीच दुर्लक्षित राहिलेली आहेत. कोरोना काळात देखील सरकारी पातळीवर ४२ गावांची हेळसांड झाली. मोठे -मोठे आरोग्य केंद्र उभारले खरे पण अजूनही मनुष्यबळाच्या प्रतिक्षेतच आहेत. यांसारख्या अनेक विषयांत ४२ गावची फरपट होत असते. परंतु यावेळी कार्यकर्त्यांची देखील मोठी फरफट ऐन निवडणुकीच्या तोंडावर पाहायला मिळत आहे.
त्याचं झालं असं की, राष्ट्रवादी काँग्रेस पक्षाचे दोन गट तयार झाले. अनेक स्वाभिमानी कार्यकर्त्यांनी शरद पवार यांच्याच बरोबर राहायचं ठरवलं, अर्थात शरद पवार यांच्या राष्ट्रवादी काँग्रेस पक्षात अनेकजण सक्रीय देखील राहिले. त्याचा फायदा लोकसभा निवडणुकीत त्यानंतर विधानसभा निवडणुकीत पाहायला मिळाला. ४२ गावात दोन्ही निवडणुकीत राष्ट्रवादी काँग्रेस शरद पवार पक्षाने मताधिक्य घेतले. ४२ गावच्या कार्यकर्त्यांचे वर्चस्व तयार झाले, सर्वच स्तरातून ४२ गावच्या राष्ट्रवादी काँग्रेस शरद पवार पक्षाच्या कार्यकर्त्यांचे कौतुक झाले. परंतु ते फार काळ टिकले नाही.
आज हेच कार्यकर्ते नेतृत्वाच्या प्रातिक्षेत पाहायला मिळत आहे. नाव न छापण्याच्या अटीवर एका सामान्य कार्यकर्त्याने खंत व्यक्त करून दाखवली की, आज ४२ गावासाठी पक्षाचा तालुकाध्यक्ष नाही, जिल्हाध्यक्ष फिरकत नाही, स्थानिक पुढारी फोन उचलत नाही, ऐन निवडणुकीच्या तोंडावर स्वाभिमानी कार्यकर्त्यांची फरपट सुरू झाली आहे. याउलट इतर पक्षातील काही इच्छुक उमेदवार आणि त्यांचे सहकारी लक्ष्मीदर्शन देऊन आमच्या उमेदवाराला सहकार्य करा असं सांगून अशा प्रकारे स्वाभिमानी कार्यकर्त्यांची अवहेलना करत आहेत.
दरम्यान ४२ गावातील राष्ट्रवादी काँग्रेस शरद पवार पक्षाच्या कार्यकर्त्यांची व मतदारांची संख्या पाहता आगामी निवडणुकीत या मतदारांना व कार्यकर्त्यांना आपलसं करण्याचे अनेक प्रयोग केले जाणार आहेत. शरद पवार यांनी स्थानिक स्वराज्य संस्थांच्या निवडणुकीत भाजप सोडून स्थानिक पातळीवर कोणाशीही हातमिळवणी करण्याच्या सूचना दिल्या आहेत. परंतु पक्षातील या ४२ गावाचे जिल्हा परिषद आणि पंचायत समितीचे तीव्र इच्छुक उमेदवार गेल्या काही दिवसांपासून मतदारांच्या संपर्कातून दुरावले आहेत अशी परिस्थिती निर्माण झाली आहे. जिल्हाध्यक्ष ही परिस्थिती स्वतःहून निर्माण करत आहेत की काय असा देखील सवाल यानिमित्ताने उपस्थित होत आहे.
सर्व पक्षांचा ४२ गावासाठी स्वतंत्र तालुकाध्यक्ष नियुक्त आहेत. राष्ट्रवादी काँग्रेस शरद पवार पक्षाला देखील स्वतंत्र तालुकाध्यक्ष होते, परंतु इतर पक्षात त्यांचा प्रवेश झाल्याने ते पद रिक्त झाले, मात्र अद्यापही जिल्हाध्यक्षांनी या पदावर कोणाचीही नेमणूक केली नाही. याच मतदारसंघातून जिल्हाध्यक्षांनी विधानसभा निवडणूक लढवली होती, त्यावेळी त्यांना अनेकांनी डोक्यावर घेतले. परंतु आज त्याच कार्यकर्त्यांना वाऱ्यावर सोडले की काय असा प्रश्न निर्माण झाला आहे.
ऐन निवडणुकीच्या तोंडावर ४२ गावातील राष्ट्रवादी काँग्रेस शरद पवार पक्ष मोडकळीस आला आहे. याच पक्षाने लोकसभा आणि विधानसभा निवडणुकीत करिष्मा दाखवून दिला आहे. या मतदारसंघाचे नेतृत्व अप्रत्यक्ष कोणाला मदत करू इच्छित आहेत हे सांगण्यासाठी आता कोणत्या ज्योतिषाची गरज नसावी. तर आगामी काळात होऊ घातलेल्या निवडणुकीत पक्षाकडून कार्यकर्त्यांना नेमक्या काय सूचना मिळतात हे पाहणे औत्सुक्याचे असणार आहे.
Add Comment